DTI Dean









DTI Dean

پەیامی ڕاگری پەیمانگا

بەڕێزان: خوێندکاران..... مامۆستایان...... فەرمانبەرانی  پەیمانگای تەکنیکی دوکان

سڵاوی زانست و پەروەردەو فێركردنتان لێبێت.

بەناوی راگرايەتی پەيمانگای تەكنيكی دوكانەوە، خۆمان بە خۆشحاڵ دەزانين كە خزمەتكارێكی هەميشەيی ئێوەى زانستخوازان بين، لە پێناوی سەرخستنی پرۆسەی خوێندن و چالاككردنەوەی پەيمانگاكەمان بۆ ئەو ئاستە زانستيەی كەخواست و ئامانجی هەموو لايەكمانە.
بەڕێزان: من وەكو راگری ئەم ناوەندە ئەكاديميە، لەگەڵ هاوكارەكان و هاوپيشەكانم لەم پەيمانگايە، بە هەوڵ و هيمەتی بەڕێز پڕۆفيسۆری ياريدەدەر دكتۆر ئالان فەرەيدون سەرۆكی زانكۆی پۆليتەكنيكی سلَێمانی و وەزارەتی خوێندني باڵاو توێژينەوەی زانستی، بەردەوام هەوڵم بۆ پێشخستنى ئەم پەيمانگايە بووە، بۆ ئەو مەبەستەش لە ماوەی دەستبەكابوونم تا حاڵى حازر هەرچى خزمەتێكم پێ كرابێت وەك راگر پێشكەش بە پەيمانگام كردووە.
هەڵبەت چانسی ئێمە وابوو، لەگەڵ دەستبەكاربونمان وەكو راگر، قەيرانێكی سەختی دارايی رووی لە هەرێمی كوردستان كرد، ئەگەرچى بووەهۆى پەكخستن و لەباربردنى بەشێك لە پلانى ئامانجە ستراتيژيەكانمان، بەڵام ئێمە لە هەوڵەكانمان بۆ خزمەتكردنی خوێندكارە ئازيزەكانمان بەردەوام بووين، هەر بۆ ئەم مەبەستە بە هەوڵ و هيمەتی كادیرەكانمان بە تايبەتی هۆبەی ئايتی پەيمانگا، توانيمان وەكو تاكە ناوەندی ئاكاديمی لەسەر ئاستی هەرێمى كوردستان، نمرەی خوێنكارەكانمان بە ئەلكترۆنی بدەينەوە، كە بێگومان ئەمەش ماندوبون و ئەركێكي زۆری مادی لەسەر شانی خوێنكاران كەمكردۆتەوە.
هەروەها بە پشتيوانی بەڕێز سەرۆكی زانكۆ توانيومانە دوو بەشی زانستی نوێ بە ناوی (پەيوەندييە گشتييەكان و ماركێتينگ) لەگەڵ بەشی (سيستەمەكانی كۆنترۆڵكردن و كارپێكردنی نەوت) بكەينەوە، هاوكات بڕيارە بۆ ساڵی خوێندنی (٢٠١٨ -٢٠١٩) بەشی (پەرستاری) لەم پەيمانگايە بكەينەوە.
لە ماوەی دوو ساڵی رابردوودا توانيومانە پەيوەندييەكی باش لەنێوان پەيمانگاو يەكە ئيداريەكانی قەزای دوكاندا دروستبكەين و وەكو تەواوكەری يەكتر لەپێناوی خزمەتی ئەم دەڤەرە لە پەيوەندی بەردەوامدابين، هەر لەم روەوە توانيومانە چەندين چالاكی جۆراوجۆر لە بوارەكانی (ئەدەبی و هونەری و وەرزشی و كلتوری لە شێوەی (وۆرك شۆپ و سيمينارو ديبەيت) گەنگەشە و ڤيستيڤاڵ بەيەكەوە لەپێناوی خزمەتكردنی خوێنكاران ئەنجامبدەين.
ئەمە جگە لەوەی هەميشە خۆمان بە هاوڕێ و هاوخەمی خوێندكاران و فەرمانبەران و مامۆستايان زانيوەو وەكو يەك خێزان مامەڵەمان كردوەو لەو روحيەتی هاوڕێيەتیەمان بەردەوام ئەبين و هەميشە نزيكترين كەس ئەبين لێتانەوە.
پلانى داهاتوومان بۆ خزمەتكردنی خوێنكاران، چەندين خزمەتگوزاری ديكەيە هەروەك كردنەوەی بەشی زانستی نوێ و بەئەلكترۆنيكردنی تەواويى پەيمانگا بە سەرجەم هۆبەكانيەوە، لەگەڵ دابينكردنی بەشی ناوخۆیی گونجاو و دۆزينەوەی هەلی كار بۆ خوێندكارە دەرچووەكانمان و ئەنجامدانی چەندين چالاكي زانستی و كلتوری و هونەری و ئەدەبی .. بەمجۆرە لە خزمەتكردنى زانستيانە بە خوێندكاران و تەواوى پەيمانگا بەردەوام دەبين.

هيوای سەركەوتن و سەرفرازی بەختەوەری بۆ هەموو لايەك

د.كاوە رەزا
راگری پەيمانگای تەكنيكی دوكان
Comments