DTI Events‎ > ‎

لە پەیمانگاى تەکنیکى دوکان مەراسیمێک بۆ سەرۆک مام جەلال بەڕێوەچوو

posted Nov 12, 2017, 8:36 AM by media dti   [ updated Nov 12, 2017, 8:37 AM ]
بۆ چلەى ماڵئاوایی مامى گەورەمان هەڤاڵ (مام جەلال) لە پەیمانگاى تەکنیکى دوکان بەئامادەبوونى بەڕێز(د.کاوە ڕەزا) ڕاگرى پەیمانگا و مامۆستایان و فەرمانبەران و خوێندکارانى پەیمانگاى تەکنیکى دوکان و ئەندامانى ئەنجومەنى زانکۆى پۆلیتەکنیکى سلێمانى و بەڕێز(شاهۆ عوسمان) قایمقامى قەزاى دوکان و بەڕێز(هەڵکەوت عبدالرحمان) لێپرسراوى رێکخستنى کۆمیتەى دوکان و بەرپرسانى حکومى و حزبی ناوچەکە ئامادەى مەراسیمەکە بوون.

سەرەتاى مەراسیمەکەش وەک وەفایەک بۆ گیانى پاکى مامى گەورەمان و سەرجەم شەهیدانى رێگاى ڕزگارى و ئازادى کوردستان، چەند ساتێک بەبێدەنگى ڕاوەستان و دواتر بەخوێندنەوەى چەند ئایەتێک لەقورئانى پیرۆز و چەند ووتارێک لەلایەن ڕاگرى پەیمانگاى تەکنیکى دوکان و قایمقام و لێپرسراوى رێکخستنى کۆمیتەى دوکان  پێشکەشکرا کە تێیدا باس لەڕۆڵى مام جەلال وەک پێشمەرگەیەک کە خاوەنى زیاتر لەنیو سەدە خەبات و تێکۆشان بوو، لەپێناوى بەدیهێنانى خەونى میلەتەکەمان و گەیشتن بەسەربەخۆیى و بوونى دەوڵەتێکى دیموکراسی و دادگەر، هەروەها مام جەلال رۆڵى بەرچاوى هەبووە لە ڕاگرتنى سەقامگیرى و هاوسەنگى لە عێراق و کوردستان، هەموو لایەکیش شایەتى ئەو ڕاستییە دەدەن کە دوورکەوتنەوەى سەرۆک مام جەلال لەشانۆى سیاسی هۆکار بوو بۆ تێکچوونى رەوشى عێراق و کوردستان بەتایبەتى کە رووبەڕوى قەیرانى سیاسی و ئابوورى بۆیەوە و دواجار ئەو ناکۆکیانەى لێکەوتەوە کە ئێستا هەم عێراق و هەم هەرێمى کوردستانیش پێیدا تێپەڕ دەبێت.

هەر لەمەراسیمەکەدا چەندین چالاکى پێشکەشکرا لەلایەن مامۆستایان و خوێندکارانى پەیمانگاى تەکنیکى دوکانەوە بریتی بوون لەخوێندنەوەى  شیعر و پەخشانە شیعر و پێشکەشکردنى چەند پارچە میوزیکێک و چەند پارچە ڤیدیۆیەک لەسەر ژیان و خەباتى سەرکردەى تێکۆشەر سەرۆک مام جەلال.

لەکۆتایی ماتەمینیکەدا داوا لە ئامادەبووانى مەراسیمەکە کرا بەناشتنى (٨٤) نەمام لەباخچەى پەیمانگاى تەکنیکى دوکان وەک (٨٤) ساڵ تەمەنى مام، هەربەو بۆنەیەوە باخچەکە ناونرا باخچەى (مام).



Comments